АҚШ президенти Доналд Трамп Россия қўшни мамлакатга 2022 йил феврал ойида бошланган кенг кўламли босқиндан бери амалга оширилган энг йирик дрон ва ракета ҳужуми ортидан Украинадаги уруш ҳолати ҳақида ўз норозилигини билдирди.
«У ерда содир бўлаётган воқеалар мени қониқтирмаяпти», — деди Оқ уй раҳбари 7 сентябр, якшанба куни Эндрюс авиабазасида журналистлар билан суҳбатда. «Мен буни ҳал қилишимизга ишончим комил. Лекин ҳозирги жараёнлардан хурсанд эмасман. Уруш билан боғлиқ барча масалалар мени мамнун қилмаяпти», — дея таъкидлади у.
Шунингдек, Трамп яқин вақт ичида Россия президенти Владимир Путин билан телефон орқали мулоқот қилиш ниятида эканини маълум қилди. «Жуда тез орада. Келгуси бир неча кун ичида», — дея унинг сўзларини CNN келтирди. Унга кўра, 5 сентябр куни Оқ уйда бўлиб ўтган брифингда ҳам Путин билан суҳбат қуриш режалари ҳақида айтиб, «Ҳа, мен гаплашаман. Биз жуда яхши алоқада бўлдик», деган эди.
Аввалроқ, 7 сентябр, якшанба куни Америка етакчиси Россияга қарши янги санкцияларни кучайтиришга тайёрлигини ҳам билдирган. Шунингдек, АҚШ молия вазири Скотт Бессент ўз баёнотида, Қўшма Штатлар ва Европа Иттифоқининг қўшимча иқтисодий босими Россия раҳбари Владимир Путинни Украина билан тинчлик музокараларини бошлашга мажбур қилиши мумкинлигини қайд этди.
Шундай қилиб, Вашингтон томонидан билдирилаётган сўнгги баёнотлар Украина атрофидаги вазият халқаро сиёсий кун тартибининг асосий мавзуси бўлиб қолаётганидан далолат бермоқда.
«Замин»ни Telegram’да ўқинг!
