Қизиқчи, сўз устаси Зокир Очилдиев “Нима гап” лойиҳасига берган интервюсида ҳаётидаги таъсирли воқеалардан бирини самимий тарзда сўзлаб берди.
Унинг айтишича, бир куни онасининг туғилган куни муносабати билан кичик байрам уюштиришни режалаштирган. Бироқ онаси бу таклифга рози бўлмаган.
“Онамнинг туғилган кунлари эди. Дугоналарини чақириб, бир хурсандчилик қилайлик десам, кўнмадилар. Ахир ота-оналар фарзандини ортиқча харажатга қўйишни исташмайди, қийин аҳволга солиб қўйишдан хавотир олишади. Кейин дугоналарининг кўпини яширинча чақириб, сюрприз қилдик. Уларга ҳеч нарса демадик. Ўшанда онамни жуда бошқача — чин дилдан хурсанд бўлганини кўрганман”, — дейди у.
Сўз устаси ушбу воқеадан кейин ҳаётида оғир дамлар бошланганини ҳам қўшимча қилди.
“Орадан бир-икки ой ўтиб, онам касал бўлиб қолдилар. Кейинчалик соғлиқлари янада ёмонлашди ва икки-уч йилдан кейин вафот этдилар. Шундан кейин тушундимки, емайман деяптиларку деб, яхши кўрган овқатини олиб бермаслик, киймайман деяптиларку деб, ёқтирган кийимини совға қилмаслик нотўғри экан. Егим келмаяпти дейишса ҳам ёқтирган таомини олиб беришимиз, киймайман дейишса ҳам яхши кўрган кўйлагини совға қилишимиз керак экан. Акс ҳолда кеч қолишимиз мумкин”, — деди у.
Зокир Очилдиевнинг фикрича, инсонларнинг кўпинча имкониятлари кенгайган, қўли ҳамма ерга етган пайтда ота-оналари ёнида бўлмаслиги мумкин.
“Кўпинча ишларимиз юришиб кетган пайтда, ҳамма нарсага имконимиз етганда, ота-онамиз ёнимизда бўлмайди. Шунинг учун улар тириклигида, бор вақтида орзу-ҳавасларини бажо келтириш керак”, — деб сўзини якунлади у.
Сўз устасининг бу самимий ва таъсирли гаплари томошабинларни бефарқ қолдирмади. Кўплаб инсонлар унинг фикрларига қўшилиб, ота-она қадрини ўз вақтида билиш зарурлигини таъкидлашмоқда.
“Zamin”ни Telegram'да ўқинг!
