Флорентино Перес Анчелоттини клубда сақлаб қолиш йўлини излаяпти

Европа Чемпионлар лигасининг амалдаги ғолиби «Реал» бу йил мусобақани эрта тарк этганидан сўнг жамоа бош мураббийи Карло Анчелоттининг клубдан кетиши ҳақида турли хабарлар тарқала бошлади.

Бу ҳолатдан фойдаланишга уринган Бразилия футбол конфедерацияси италиялик таниқли мутахассисни миллий терма жамоасига олиб келишга яна бир бор ҳаракат қилди. Аммо Marca нашрининг маълум қилишича, 65 ёшли Анчелотти яна бир марта бразилияликларнинг таклифини рад этган.

Анчелотти «Реал»даги ишини давом эттиришни истайди ва клубни тарк этиш ниятида эмас. «Қироллик клуби» раҳбарияти ҳам италиялик мураббийнинг қолиш истагидан хабардор бўлиб, унга нисбатан дўстона муносабатларини давом эттирмоқчи. Клуб президенти Флорентино Перес ҳам Анчелотти билан ҳамкорликни сақлаб қолиш тарафдори.

Шу билан бирга, агар Анчелотти бош мураббийликдан олинган тақдирда ҳам, «Реал» раҳбарияти унга клубда бошқа вазифани ишониб топширишга тайёр эканини маълум қилган.

Карло Анчелоттидан салбий жавоб олган Бразилия футбол конфедерацияси энди бошқа номзодга мурожаат қилиши мумкин. Хабарларга кўра, Бразилия терма жамоаси бошқарувига ҳозирда Саудия Арабистонининг «Ал-Ҳилол» клубида ишлаётган Жорже Жезуш олиб келиниши кутилмоқда.

Сиз нима деб ўйлайсиз: Анчелотти “Реал”ни яна бош мураббий сифатида бошқаришда давом этамиди ёки янги ролга ўтади? «Замин»ни Telegram’да ўқинг!