Эйндховенда ўзбек боксчиларининг ёрқин ғалабалари: уч финал йўлланмаси қўлда!

Нидерландиянинг Эйндховен шаҳрида бокс бўйича анъанавий "Эйндховен кубоги" халқаро турнири энг қизғин палласига кириб келди. Жаҳоннинг кучли чарм қўлқоп усталари ўртасида кечаётган баҳсларда миллий терма жамоамизнинг иқтидорли боксчилари яна бир бор юртимиз шарафини муносиб ҳимоя қилишмоқда.

Ярим финал босқичидаги жангларда Ўзбекистон терма жамоасидан уч нафар спортчи финал йўлланмаси учун рингга кўтарилди. Улар ўз жангларини юқори савияда ўтказиб, барча учрашувларда тўлиқ ва ишончли ғалабаларни қўлга киритишди.

Биринчи бўлиб Абдумалик Халоков (-60 кг) рингга чиқди. Унинг рақиби мезбон мамлакат вакили Маҳмуд Ал Чабтун бўлди. Халоков жангнинг бошиданоқ ташаббусни ўз қўлига олди ва рақибига зарбалар ёғдириб, рингда тўлиқ устунлик қилди. Тўлиқ давом этган уч раунд якунларига кўра, ҳакамлар якдиллик билан 5:0 ҳисобида ўзбек боксчисини ғолиб, деб топишди. Ҳал қилувчи финалга чиққан Абдумалик юртимизга олтин медал келтиришга жуда яқинлашди.

Кечанинг яна бир ёрқин учрашуви -70 кг вазн тоифасида Асадхўжа Мўйдинхўжаев иштирокида бўлди. Унинг рақиби озарбайжонлик тажрибали чарм қўлқоп устаси Наби Исгандаров эди. Бу баҳс кутилганидан ҳам қизғин кечди ва Мўйдинхўжаевнинг ажойиб техникаси ҳамда тезкорлиги омма эътиборини тортди. Боксчимиз уч раунд давомида тўхтовсиз зарбалар ёғдириб, рақибининг ҳар қандай уринишларига муваффақиятли қарши жавоб берди. Якунловчи раундда ҳам Асадхўжа устунлигини сақлаб қолиб, ҳакамлар қарорини 5:0 ҳисобида ўз фойдасига ҳал қилди.

Қизиғи шундаки, жангдан сўнг "World Boxing" ташкилоти президенти Борис ван дер Ворст Асадхўжа билан махсус учрашиб, бу учрашувни кечанинг энг яхши ярим финал баҳсларидан бири сифатида юқори баҳолади.

Кечанинг энг оғир вазн тоифаси бўлган -90 кг вазнда эса Тўрабек Хабибуллаев ҳам ўзининг маҳорат ва кучи билан рақибига имкон қолдирмади. У қозоғистонлик Тоғамбай Сағиндикга қарши жанг қилди ва рақибининг ҳимоясини бир неча бор тешиб ўтиб, зарбаларининг аниқлиги билан ҳайратлантирди. Ҳабибуллаев рақибини учала раундда ҳам қаттиқ босим остида сақлаб, 5:0 ҳисобида ғалабани нишонлади ва ўз вазн тоифасида финалга йўл олди.

Бугунги кун якунлари миллий жамоамизнинг халқаро миқёсдаги нуфузини янада кўтариб, ўзбек боксининг янги истеъдодлари учун келажакдаги буюк ғалабалар эшигини очмоқда. Боксчиларимиз финалда ҳам ажойиб жанглар кўрсатиб, "Эйндховен кубоги"даги муваффақиятли юришни ғалаба билан якунига етказишга тайёр эканликларини маълум қилишди.

Ўзбекистон бокс федерацияси ушбу йирик ютуқлар билан барча мухлисларни ва юртдошларни табриклади. Бокс ихлосмандлари эртанги ҳал қилувчи финал жангларида ҳам Ўзбекистон термасига омад ва катта ғалабалар тиламоқда. Ҳа, Эйндховендан совринлар билан қайтиш арафасидаги чарм қўлқоп усталаримиз учун энди орқага йўл йўқ – фақат ғалаба сари интилмоқдалар! «Замин»ни Telegram’да ўқинг!