Қозоғистон терма жамоаси бош мураббийи Али Алиев ЖЧ-2026 саралаш босқичи доирасида Бельгиядан кечган 0:6 ҳисобидаги оғир мағлубиятдан кейин ўз лавозимини тарк этишини маълум қилди. Бу ҳақда sports.kz манбаси орқали хабар тарқатилди.
Матбуот анжуманида мураббий ўз сўзини очиқ баёнот билан бошлади:
«Майдонда рўй берган барча воқеалар учун масъулият менинг зиммамда. Футболчиларни айблашга ҳеч қандай асос йўқ. Барчаси менинг хатоларим натижаси. Шу боис мен истеъфо аризасини ёзиб, юртимизга қайтганимиздан сўнг дарҳол федерация президентига топшираман», – деди Алиев.
Эслатиб ўтиш керак, Қозоғистон терма жамоаси саралашнинг дастлабки беш ўйинида бор-йўғи 3 очко жамғарди. Алиев бошчилигидаги жамоа Бельгиядан ташқари Уэльс билан икки марта (1:3, 0:1) ҳамда Шимолий Македонияга қарши (0:1) баҳсларда ҳам мағлубиятга учради. Фақатгина гуруҳнинг асосий аутсайдери ҳисобланган Лихтенштейнга қарши ўйинда (2:0) ғалаба қозонишнинг уддасидан чиқишди.
Шу тариқа, Қозоғистон термаси турнир жадвалида пастки поғоналардан чиқолмаяпти. Али Алиев эса натижалар учун шахсан жавобгарликни ўз зиммасига олиб, орқасига йўл қолдирмасдан истеъфо беришга қарор қилди.
Бу воқеа мамлакат футбол жамоатчилиги учун катта ўйлантирувчи ҳолат бўлиб, энди федерация олдида жамоани қайта тиклаб оладиган янги мураббий тайинлаш вазифаси турибди.
«Замин»ни Telegram’да ўқинг!
