Маълумки, айни дамларда Англиянинг Ливерпуль шаҳрида катталар ўртасидаги нуфузли жаҳон чемпионати қизғин тарзда кечмоқда. Унда дунё бокс юлдузлари қаторидан юртимиз вакиллари ҳам муносиб иштирок этишмоқда.
-48 килограмм вазн тоифасида юртимиз шарафини ҳимоя қилаётган иқтидорли спортчи Сабина Бобоқулова мусобақанинг муҳим босқичида Италия терма жамоаси аъзоси Жованна Марчесега қарши рингга кўтарилди.
Беллашув тўлиқ 3 раунд давом этди ва жуда ҳам кескин кураш остида кечди. Жангнинг энг ёрқин лаҳзаларидан бири — Бобоқулованинг рақибасини бир марта нокдаун ҳолатига тушириши бўлди. Бу ҳолат унга психологик устунлик берди ва қолган раундларда ҳам у ўзини ишончли намоён этди.
Якунда ҳакамлар бир овоздан қарор чиқариб, ғалабани Сабина Бобоқуловага топширишди. Бу натижа орқали ҳамюртимиз жаҳон чемпионатининг ярим финалига йўл олиб, яна бир маротаба ўз маҳоратини намойиш этди.
Эндиликда у медал учун баҳс олиб боради ва барча ишқибозлар ундан янги зафарлар кутишмоқда. Мухлислар эса Бобоқулованинг жасорати ва қайсарона иродаси билан ғурурланишмоқда.
«Замин»ни Telegram’да ўқинг!
