Ливерпул шаҳрида ўтаётган катталар ўртасидаги жаҳон чемпионатида куннинг бешинчи финал жангини ўзбекистонлик иқтидорли боксчи қизимиз Навбаҳор Ҳамидова ўтказди. У -65 кг вазн тоифасида қозоғистонлик Аида Абикеевага қарши рингга чиқди.
Беллашув жуда шиддатли ва кескин ўтди. Илк икки раундда Навбаҳор очколарда олдинда эди, рақибини кўп жиҳатдан қийин аҳволга солди. Бироқ учинчи раундда ҳакамлар уни огоҳлантиришди ва бу қарор жанг тақдирига таъсир кўрсатди. Якунда ҳакамлар ягона қарор билан қўшни Қозоғистон вакиласини ғолиб сифатида эълон қилишди.
Шу тариқа, Навбаҳор Ҳамидова Ўзбекистон делегацияси учун жаҳон чемпионатидаги ҳозирча ягона кумуш медални қўлга киритди. Бу натижа ҳам аслида юртимиз бокс мактаби учун катта ютуқ ҳисобланади.
Эслатиб ўтамиз, Фазлиддин Эркинбоев юртимизга биринчи олтинни олиб келган бўлса, Асадхўжа Мўйдинхўжаев иккинчи, Жавоҳир Умматалиев учинчи, Тўрабек Ҳабибуллаев тўртинчи ва Абдумалик Халоков бешинчи олтин медални қўлга киритишди. Шунингдек, мусобақанинг аввалги кунларида аёллар ўртасидаги баҳсларда боксчиларимиз 3 та бронза билан тақдирланишганди.
Бокс. ЖЧ-2025. Финал. 14 сентябр
-65 кг: Навбаҳор Ҳамидова — Аида Абикеева (Қозоғистон) – 2:3
Куннинг қолган қисмида Акмалжон Исроилов (Англияга қарши) ва Жаҳонгир Зокиров (Қозоғистонга қарши) ҳам олтин медал учун рингга кўтарилади. Мусобақа якунида Ўзбекистон делегацияси янада юқори натижаларни қўлга киритишга интилмоқда.
«Замин»ни Telegram’да ўқинг!
