Англия футболида кам учрайдиган ҳодиса рўй берди: “Манчестер Юнайтед” академияси тарбияланувчиси Деметри Митчелл янги жамоасини сунъий интеллект — машҳур ChatGPT орқали топди.
28 ёшли манчестерлик ярим ҳимоячи журналистларга берган интервюсида шундай деди: “ChatGPT — энг яхши агент экан, чунки комиссия талаб қилмайди. Фақат жамоа топиб берибгина қолмай, Лондонда яшаш харажатларини, клуб даражасидан келиб чиқиб қандай маош сўраш кераклигини ҳам ҳисоблаб чиқди”.
Натижада Митчелл Англиянинг қуйи профессионал лигаларидан бири — League One иштирокчиси “Лейтон Ориент” билан шартнома имзолади. Бу клуб ўзбекистонлик ишқибозларга бегона эмас: ўтган мавсум Англия Кубоги доирасида “Манчестер Сити”га қарши баҳсда Абдуқодир Ҳусанов Лондондаги учрашувда майдонга тушиб, айнан шу жамоа дарвозасига гол урганди ва Англия футбол тарихида гол урган илк ўзбек футболчиси сифатида тилга кирганди.
Деметри Митчелл манчестерлик бўлгани учун “Юнайтед” академиясида ўсган, бир неча ёш тоифаларида ўйнаган, аммо асосий таркибга мустаҳкам жой ололмаган. У Шотландиянинг “Харт оф Мидлотиан” жамоасида икки бор ижарада тўп тепди, кейин “Хайберниан”, Англияда “Блэкпул” ва “Эксетер” сафида ҳаракат қилди. Ўтган мавсум охирида “Эксетер” билан битими тугагач, эркин агентга айланди.
Сунъий интеллект орқали топилган янги манзил — “Лейтон Ориент” билан келишув 2027 йил 30 июнигача мўлжалланган. Митчелл аллақачон жамоада мунтазам ўйин амалиётига эга: барча мусобақаларда 11 та учрашувда иштирок этди.
Қизиғи, “Юнайтед” мактабини тамомлаган Митчелл ёшлигидан иқтидорли авлод вакили сифатида қайд этилган — у Англия U-20 терма жамоасида ҳам тўрт бор майдонга тушган. Шунга қарамай, универсал позицияларда ўйнай оладиган футболчи мутлақ юқори савияда ўзини намоён эта олмади ва омадини қуйи лига клубларида синаётир.
Бироқ бу сафар ҳикоянинг бош қаҳрамони — сунъий интеллект. Митчелл мисоли кўрсатмоқда: замонавий футбол бозорида сунъий интеллект воситалари агентлар ўрнини босмайди, аммо тўғри йўналиш танлаш, бозорни баҳолаш ва музокараларга тайёргарликда чинакам “қўлланма”га айланиши мумкин.
“Zamin”ни Telegram'да ўқинг!
