Артета янги лойиҳага ишонтирмоқда: Каррерас трансфери қизғинлашди
"Арсенал" клуби "Реал Мадрид" ҳимоячиси Алваро Каррерас трансферига жиддий қизиқиш билдирмоқда. Бош мураббий Микел Артета ёш футболчини ўз режаларида муҳим ўринга қўйиб, асосий ролни ваъда қилган. Унинг универсаллиги ва барқарор ўйини "Арсенал" ҳимоясини кучайтириши кутилмоқда, аммо трансфер осон бўлмайди, чунки бошқа клублар ҳам уни кузатмоқда. Каррераснинг бозор қиймати тахминан 60 миллион еврога баҳоланмоқда.
Лондоннинг "Арсенал" клуби трансфер бозорида фаол ҳаракатни давом эттирмоқда. Жамоа Мадриднинг "Реал" клуби ҳимоячиси Алваро Каррерасни ўз таркибига қўшишга жиддий қизиқиш билдирмоқда. Манбаларга кўра, “тўпчилар” футболчининг вакиллари билан аллақачон музокараларни бошлаган.
Жамоа бош мураббийи Микел Артета Каррерасни шахсан ўзининг келажак режаларида муҳим бўғин сифатида кўрмоқда. У ёш ҳимоячига “Арсенал” лойиҳасида асосий роль ўйнаш имкониятини ваъда қилгани айтилмоқда. Бу эса футболчининг қарор қабул қилишида муҳим омил бўлиши мумкин.
23 ёшли испаниялик ҳимоячининг "Реал Мадрид" билан шартномаси 2031 йилгача амал қилади. Шу сабабли унинг трансфери осон кечмаслиги аниқ. Бироқ “Арсенал” бу курашда якка эмас — "Манчестер Юнайтед", "Ювентус" ва "Наполи" ҳам футболчини яқиндан кузатиб бормоқда.
Мутахассислар фикрича, Каррерас замонавий футболда чап қанот ҳимояси учун барқарор ва узоқ муддатли ечим бўлиши мумкин. Унинг универсаллиги жамоага ҳам ҳимояда, ҳам ҳужумда қўшимча куч беради.
Жорий мавсумда футболчи барча мусобақаларда 37 та учрашувда майдонга тушиб, 2 та гол ва 2 та голли узатма амалга оширган. Transfermarkt маълумотига кўра, унинг бозор қиймати тахминан 60 миллион евро атрофида баҳоланмоқда.
Агар бу трансфер амалга ошса, у “Арсенал”нинг келажакдаги катта режалари учун муҳим қадам бўлиши ва жамоанинг ҳимоя чизиғини сезиларли даражада кучайтириши мумкин.
Изоҳлар 0
…