Жадон Санчо «Боруссия Дортмунд» клубига қайтишга розилик берди

Англиялик ҳужумчи Жейдон Санчонинг «Боруссия Дортмунд» клубига қайтиши тобора ойдинлашмоқда. Скй нашри хабарига кўра, футболчининг вакиллари ва Германия клуби ўртасида янги музокаралар ўтказилган. Ҳозирда «Астон Вилла»да ижара асосида тўп сураётган 26 ёшли вингер Дортмундга қайтиш истагини клуб раҳбариятига маълум қилган. Бу ҳақда Goal.com хабар беради.

Томонлар шахсий шартнома шартларини муҳокама қилишни бошлади. Санчо «Манчестер Юнайтед»да оладиган йиллик 15 млн евро миқдоридаги маошининг сезиларли даражада камайишига рози бўлган. «Боруссия Дортмунд» раҳбарияти бир неча ҳафта олдин футболчини молиявий чекловлар ҳақида огоҳлантирган эди. Санчога «Ювентус» каби клублардан таклифлар бўлишига қарамай, у айнан Бундеслигага қайтишни афзал кўрмоқда.

Санчонинг «Манчестер Юнайтед» билан амалдаги шартномаси жорий мавсум якунида тугайди, шу сабабли немис клуби трансфер учун тўлов амалга оширмайди. Футболчи 2021 йилда 85 млн евро эвазига Англияга йўл олган эди, бироқ у ерда кутилган ўйинни кўрсата олмади. Мураббий Эрик тен Хаг билан юзага келган келишмовчиликдан сўнг, у 2024 йилнинг январида Дортмундга вақтинча қайтиб, жамоанинг Европа Чемпионлар лигаси финалига чиқишига ёрдам берганди.

«Боруссия Дортмунд» бош мураббийи Нико Ковач Санчонинг трансферини қўллаб-қувватламоқда. Хорватиялик мутахассис футболчининг интизоми билан боғлиқ муаммоларга қарамай, унинг иқтидорига ишонч билдирган. Санчо жамоани тарк этиши кутилаётган Жулиан Брандтнинг ўрнини эгаллаши мумкин. Клуб спорт директори Ларс Риккеннинг таъкидлашича, жамоага сифатли ва молиявий жиҳатдан қулай бўлган ҳужумчи зарур.