"Реал Мадрид" афсонаси Фернандо Иерро Криштиану Роналдонинг 2026 йилги жаҳон чемпионатида иштирок этиш имкониятларини юқори баҳолади. Собиқ спорт директори 41 ёшли ҳужумчининг профессионал интизоми уни Шимолий Америкадаги турнирда Португалия терма жамоасининг асосий кучига айлантиришини таъкидлади. Бу ҳақда Goal.com хабар беради.
Роналдо жорий мавсумда Саудия Арабистони чемпионатида юқори натижа кўрсатмоқда. У "Ал-Насср" сафида 25 ўйинда 24 та гол уриб, 2 та голли узатмани амалга оширди. Бу кўрсаткичлар унинг ёшига қарамай ҳамон элита даражасида эканлигини исботламоқда. Иерронинг фикрича, агар жиддий жароҳатлар бўлмаса, Криштиану Роберто Мартинес қайдномасидан жой олиши шарт.
«Мен Криштиану ҳамон энг юқори даражада рақобатлашишга қодир деб ҳисоблайман. У ўз танасига жуда яхши ғамхўрлик қилади ва ҳар доим тайёр туради. Унинг жаҳон чемпионатида иштирок этмаслиги учун ҳеч қандай сабаб кўрмаяпман», — деди Иерро Мисрнинг "ON Спорт" каналига берган интервьюсида.
Иерро Роналдонинг муваффақият сири унинг тўхтовсиз иштиёқида эканини айтди. Беш карра «Олтин тўп» соҳиби терма жамоа сафида 226 ўйинда 143 та гол уриб, мутлоқ рекордчи бўлиб турибди. Унинг ғалабаларга бўлган ташналиги ва ҳар куни ўз устида ишлаши уни бошқа футболчилардан ажратиб турувчи асосий модель ҳисобланади.
Португалия терма жамоаси 17 июн куни Конго ДРга қарши ўйин билан ўз юришини бошлайди. Гуруҳ босқичида Роналдони Ўзбекистон ва Колумбия терма жамоаларига қарши баҳслар кутмоқда. Ҳозирда ҳужумчи ўзининг спорт формасини сақлаб қолиш ва турнирга жамоанинг асосий етакчиси сифатида етиб боришни мақсад қилган.
“Zamin”ни Telegram'да ўқинг!
