Англия кубоги ярим финали доирасида «Челси» ва «Лидс» жамоалари ўзаро баҳс олиб боради. Лондон клуби айни дамда инқирозли ҳолатда бўлиб, кетма-кет бешта мағлубиятдан сўнг Еврокубоклар ҳудудидан чиқиб кетди. Жамоа бош мураббийи Лиам Розениор истеъфога чиқарилгач, вақтинчалик бошқарув Калум Макфарланга топширилди. «Челси» ушбу мавсумда илк бор Премьер-лига даражасидаги рақибга қарши майдонга тушади. Бу ҳақда Goal.com хабар беради.
«Лидс» жамоаси барча мусобақаларда етти ўйиндан иборат мағлубиятсиз сериясини давом эттирмоқда. Даниэл Фарке шогирдлари чемпионатда 40 очколик довонни забт этиб, элитада қолиш масаласини деярли ҳал қилди. Эндиликда «товуслар» бор эътиборини кубок баҳсига қаратиши мумкин. Жамоа 1973 йилдан буён илк бор финал йўлланмасини қўлга киритиш учун курашади.
Таркиб масаласида «Челси» жиддий йўқотишларга дуч келган. Жамоа етакчилари Коул Палмер ва Жоао Педро жароҳат сабаб майдонга туша олмайди, Эстевао эса мавсум охиригача сафдан чиққан. «Лидс» сафида эса Даниэл Жеймс умумий гуруҳга қайтган бўлса-да, Антон Стах ҳали ҳам жароҳатини даволаш билан банд.
Статистикага кўра, «Челси» ушбу мусобақанинг сўнгги 15 та ярим финалидан 12 тасида ғалаба қозонган. Бироқ лондонликлар 2012 йилдан бери атиги бир марта кубокни боши узра баланд кўтарган. Учрашув 2026 йил 26 апрель куни Тошкент вақти билан соат 20:00 да старт олади.
