"PSJ" жамоаси "Анжер" устидан 3:0 ҳисобида ғалаба қозонди
«ПСЖ» жамоаси Франция чемпионати доирасида «Анжер»ни 3:0 ҳисобида мағлуб этиб, турнир жадвалидаги пешқадамлигини янада мустаҳкамлади. Бош мураббий Луис Энрике асосий футболчиларга дам берган ҳолда, ушбу ғалабани Чемпионлар лигаси ярим финалидаги «Бавария»га қарши баҳс олдидан муҳим тайёргарлик деб атади. Бироқ учрашув давомида ҳимоячилар Ашраф Ҳакими ва Лукас Эрнандеснинг жароҳат сабаб алмаштирилгани парижликлар учун хавотирли ҳолат бўлди. Энди жамоа сешанба куни ўз майдонида Мюнхен клубига қарши бўлиб ўтадиган дастлабки учрашувга тайёргарлик кўради.
Франциянинг "PSJ" клуби Чемпионлар лигаси ярим финали доирасидаги "Бавария"га қарши баҳс олдидан ўз ички чемпионатида ишончли ғалабага эришди. Парижликлар сафарда "Анжер" жамоасини 3:0 ҳисобида мағлуб этиб, турнир жадвалидаги пешқадамлигини мустаҳкамлади. Бу ҳақда Goal.com хабар беради.
Учрашувда Канг-Ин Ли, Сенни Маюлу ва Лукас Бералдо томонидан киритилган голлар меҳмонларга муваффақият келтирди. Жамоа бош мураббийи Луис Энрике ушбу баҳсда Усмон Дембеле ва Хвича Кварасхелия каби етакчи футболчиларга дам беришга қарор қилди.
Луис Энрике ўйиндан сўнг жамоасининг ҳолатидан мамнунлигини билдирди. «Бундай натижа Чемпионлар лигаси ярим финали учун энг яхши тайёргарликдир.
Бу ҳар бир ўйинчи, жамоа ва мухлислар ишончи учун муҳим. Биз тайёрмиз», — деди мутахассис.
Шу билан бирга, парижликлар таркибида жароҳат билан боғлиқ хавотирлар юзага келди. Ҳимоячилар Ашраф Ҳакими ва Лукас Эрнандес ноқулайлик сабабли танаффусда алмаштирилди.
Ҳозирча уларнинг Мюнхен клубига қарши майдонга тушиши сўроқ остида турибди.
Эслатиб ўтамиз, "Бавария" ўзининг сўнгги ўйинида "Майнц" устидан 4:3 ҳисобида қийин ғалабага эришган эди. Икки гранд жамоа ўртасидаги Чемпионлар лигасининг дастлабки учрашуви сешанба куни Парижда бўлиб ўтади.
Изоҳлар 0
…