Арсенал ва Франция афсонаси Тьерри Анри Лионел Месси ва Криштиану Роналду ўртасидаги абадий баҳсга ўз муносабатини билдирди. У икки буюк футболчини бир-биридан ажратиб бўлмаслигини таъкидлаб, уларнинг рақобатини теннис юлдузлари Рожер Федерер ва Рафаел Надал ўртасидаги қарама-қаршиликка қиёслади. Бу ҳақда Goal.com хабар беради.
Марcа нашрига берган интервюсида Анри улардан бирини танлаш нотўғри эканини таъкидлади. "Нега одамлар уларни ажратишга уринишади? Ахир уларнинг ўйинидан завқ олиш мумкин-ку. Мен Лео билан бирга ўйнаганман ва ҳиссий жиҳатдан уни афзал кўраман, аммо бу Криштиануга қарши чиқишим керак дегани эмас. Иккаласи ҳам ўзга сайёраликлар каби футбол чўққисида турибди", — деди франциялик собиқ ҳужумчи.
Анри уларнинг нафақат иқтидорига, балки узоқ йиллар давомида юқори савияни сақлаб қолганига ҳам алоҳида тўхталди. Унинг сўзларига кўра, икки футболчининг деярли йигирма йил давомида жаҳон футболи чўққисида қолиши қатъий интизом ва машаққатли меҳнат маҳсулидир.
Статистикага назар ташласак, Лионел Месси саккиз карра Олтин тўп соҳиби ва 2022-йилги Жаҳон чемпиони ҳисобланади. Криштиану Роналду эса беш карра Олтин тўп ва беш марта Чемпионлар лигаси ғолиби бўлган. Иккала футболчи ҳам ўз фаолиятининг сўнгги босқичида ҳам рекордлар ўрнатишда ва мухлисларни ҳайратда қолдиришда давом этмоқда.
“Zamin”ни Telegram'да ўқинг!
