Криштиано Роналдо ўзининг ёрқин фаолиятида навбатдаги тарихий маррани забт этди. Саудия Арабистони чемпионати доирасида "Ал-Шабаб"га қарши кечган баҳсда (4:2) португалиялик афсонавий ҳужумчи ўзининг 100-голини нишонлади. Садио Мане томонидан узатилган тўпни дарвозага аниқ йўллаган Роналдо, жамоасининг ғалабасига муносиб ҳисса қўшди. Бу ҳақда Goal.com хабар беради.
Учрашув қаҳрамони эса Жоао Фелих бўлди. У ўйин давомида хет-трик қайд этиб, "Ал-Насср"нинг ҳужум чизиғида етакчилик қилди. Фелих учрашувнинг 3-дақиқасидаёқ ҳисобни очди, 10-дақиқада эса иккинчи голини урди. Ўйиннинг сўнгги дақиқаларида пеналтини аниқ амалга оширган футболчи ўзининг учинчи голини нишонлаб, якуний ҳисобни ўрнатди.
"Ал-Шабаб" сафида Янникк Карраско ва Али Ал-Булаиҳи гол уришган бўлса-да, бу мезбонларга очко олиш учун етарли бўлмади. Ушбу ғалабадан сўнг "Ал-Насср" турнир жадвалида пешқадамликни мустаҳкамлаб, энг яқин таъқибчиси "Ал-Ҳилал"дан 5 очко олдинга ўтиб олди.
Жорж Жезус шогирдлари чемпионлик сари дадил одимламоқда. Роналдо эса жорий мавсумда чемпионатдаги барча рақиблар дарвозасини ишғол қилишга муваффақ бўлди. Олдинда жамоани "Ал-Ҳилал"га қарши ҳал қилувчи тўқнашув кутиб турибди.
“Zamin”ни Telegram'да ўқинг!
