Андони Ираола ўзининг мураббийлик фаолияти борасидаги ноаниқликлар билан Челси, Реал Мадрид ва Манчестер Юнайтед каби гранд клубларни кутиш ҳолатида қолдирди. Борнмут бош мураббийи жорий мавсум якунида жамоани тарк этишини тасдиқлаган бўлса-да, янги лойиҳага ўтишга шошилмаётганини таъкидлади. Бу ҳақда Goal.com хабар беради.
Айни дамда Борнмут Англия Премер-лигасида 55 очко билан олтинчи ўринда бормоқда. Жамоа Чемпионлар лигаси йўлланмаси учун Ливерпул ва Астон Вилла билан қаттиқ кураш олиб бормоқда. Ираола учун асосий мақсад — мавсумни тарихий натижа билан якунлаб, мухлисларга еврокубок совғасини тақдим этишдир.
ОАВ хабарларига кўра, Манчестер Юнайтед раҳбарияти Майкл Керрикнинг келажаги бўйича якуний қарорга келмагунича, испаниялик мутахассисни асосий номзод сифатида кўриб чиқмоқда. Шунингдек, Челси ва Реал Мадрид ҳам мураббийнинг вазиятини диққат билан кузатмоқда.
Ираола ўзининг кетиши ҳақида гапирар экан, клуб раҳбарияти билан муносабатлари жуда очиқ ва самимий эканини қайд этди. Борнмут эса келаси мавсум учун аллақачон Марко Розе билан келишувга эришганини эълон қилиб, жамоада барқарорликни сақлаб қолишга ҳаракат қилмоқда.
Мураббийнинг ўзи эса келажаги ҳақидаги саволларга жавоб беришдан бош тортиб, барча эътиборини мавсумнинг ҳал қилувчи ўйинларига қаратганини билдирди. Унинг кейинги манзили Манчестер, Лондон ёки Мадрид бўлишидан қатъи назар, ҳозирги асосий вазифа — Борнмутни Европа майдонларига олиб чиқишдир.
“Zamin”ни Telegram'да ўқинг!
