Манчестер Сити ярим ҳимоячиси Родри Англия Премер-лигасидаги чемпионлик пойгасида психологик босимни оширмоқда. Испаниялик футболчи Арсенал жамоасини сўнгги босқич ҳар доим энг қийини эканлиги ҳақида огоҳлантирди. Микел Артета шогирдлари турнир жадвалида пешқадамлик қилаётган бўлса-да, Родри 22 йиллик танаффусдан сўнг чемпионликни қўлга киритиш босими «канонирлар»нинг хато қилишига сабаб бўлиши мумкинлигига ишонади. Бу ҳақда Goal.com хабар беради.
ФА Кубоги финалида Челси устидан қозонилган ғалабадан сўнг, Родри диққатини тўлиқ ички чемпионатга қаратди. Баллон дъОр соҳиби Арсенал учун чемпионликни расмийлаштириш ташқаридан кўринганидан кўра анча мураккаброқ вазифа эканлигини таъкидлади. Унинг сўзларига кўра, Манчестер Сити ўз тажрибасидан келиб чиқиб, сўнгги дақиқаларгача курашиш кераклигини яхши билади.
Родри 2022-йилги мавсумдаги Астон Вилла билан бўлган драматик ўйинни эслаб, футболда ҳар қандай нарса юз бериши мумкинлигини қўшимча қилди. Ўша ўйинда Манчестер Сити чемпионликни бой бериш арафасида турган бўлса-да, якунда ғалабани илиб кетган эди. Ҳозирги вазиятда эса Пеп Гвардиола шогирдлари Арсенал очко йўқотишини кутишга мажбур.
Англия Премер-лигасида кескинлик чўққига чиқди. Арсенал ўз ўйинларини муваффақиятли якунлашга интилаётган бўлса, Манчестер Сити ҳар бир имкониятдан фойдаланиб, босимни сақлаб қолишни мақсад қилган. Чемпионлик тақдири мавсумнинг сўнгги турларида ҳал бўлиши кутилмоқда.
“Zamin”ни Telegram'да ўқинг!
