Бразилия терма жамоаси бош мураббийи Карло Анселотти 2026-йилги Жаҳон чемпионати учун якуний таркибни эълон қилди. Рўйхатдан ўрин олган тажрибали ҳужумчи Неймар бу хабарни эшитгач, ўз ҳис-туйғуларини яшира олмади. У ўзининг Instagram саҳифасида турмуш ўртоғи Бруна Бианкарди ва яқин дўстлари қуршовида йиғлаётгани акс этган таъсирли видеони бўлишди. Бу ҳақда Goal.com хабар беради.
2023-йилнинг октябрь ойида тиззасидан жиддий жароҳат олган Неймар узоқ давом этган тикланиш жараёнидан сўнг катта футболга қайтмоқда. 34 ёшли футболчи Бразилия терма жамоаси тарихидаги энг яхши тўпурар ҳисобланади ва бу унинг фаолиятидаги тўртинчи мундиал бўлади.
Карло Анселотти матбуот анжуманида Неймарнинг таркибга киритилишини қатъий ҳимоя қилди. Мураббийнинг сўзларига кўра, Неймар нафақат майдондаги маҳорати, балки жамоа ичидаги муҳитни яхшилаш ва тажрибаси билан ҳам Бразилия учун муҳим фигура ҳисобланади.
Бироқ, таркибнинг эълон қилиниши барча учун ҳам қувончли бўлмади. Англия Премер-лигасида ажойиб мавсум ўтказган Жоао Педро якуний рўйхатдан четда қолди. Ҳужумчи ижтимоий тармоқлардаги саҳифасида бу қарорни хотиржамлик билан қабул қилганини ва терма жамоага омад тилашини ёзиб қолдирди.
Бразилия терма жамоаси энди Шимолий Америкада бўлиб ўтадиган мундиалга тайёргарликни бошлайди. Жамоа гуруҳ босқичидаги илк учрашувини 13-июн куни Марокашга қарши ўтказади. Унгача эса Панама ва Миср терма жамоаларига қарши ўртоқлик ўйинлари режалаштирилган.
“Zamin”ни Telegram'да ўқинг!
