Бавария спорт директори Макс Эберл клуб фахрий президенти Ули Хёнесснинг унинг келажаги борасидаги шубҳаларига муносабат билдирди. Германия кубоги финалида Бавария жамоасининг ВфБ Штутгарт устидан қозонилган 3:0 ҳисобидаги ғалабасидан сўнг, Эберл Sky нашрига берган интервюсида Хёнесснинг гаплари уни ҳайрон қолдирганини яширмади. Бу ҳақда Goal.com хабар беради.
Аввалроқ Хёнесс Дер Спиегель нашрига берган интервюсида Эберлнинг 2027-йилда якунланадиган шартномаси узайтирилиши имкониятларини 60-40 нисбатда баҳолаган эди. "Мен ўз ишимни бажаришни ва натижалар орқали ўзимни исботлашни хоҳлайман. Бу мавсумда жамоа сифатида эришган ютуқларимиз билан фахрланишимиз мумкин. Одамларда шубҳа бўлиши табиий, бу уларнинг ҳуқуқи", — дея таъкидлади Эберл.
Эберл 2024-йилнинг март ойида Бавария сафига келиб қўшилган ва қисқа вақт ичида Венсан Компани бош мураббий этиб тайинланишида муҳим рол ўйнаган эди. Компани қўл остида Мюнхен клуби жорий мавсумда ҳам Бундеслигада, ҳам Германия кубогида ғолиб чиқиб, "олтин дубл"ни қайд этди. Чемпионлар лигаси ярим финалида эса Пари Сен-Жермен жамоасига қарши кечган драматик баҳслардан сўнг турнирни тарк этди.
Ули Хёнесс ўзининг 60:40 кўринишидаги прогнози борасида тўхталар экан, бу унинг шахсий ва холис фикри эканлигини билдирди. "Мени танийдиганлар биладики, мен доим ростини гапираман. Вазият шундай, икки-уч ойдан кейин ҳаммаси ойдинлашади. Шахсан мен унинг келажагига ижобий қарайман", — деди 74 ёшли мутахассис.
Май ойи охирида Бавария кузатув кенгаши, жумладан Карл-Ҳеинз Румменигге иштирокида йиғилиш ўтказилади. Унда Макс Эберл ва спорт директори Чристопҳ Фреунднинг шартномаларини узайтириш масаласи муҳокама қилиниши кутилмоқда. Ҳозирча ҳар икки раҳбарнинг амалдаги келишуви 2027-йилгача мўлжалланган.
“Zamin”ни Telegram'да ўқинг!
