Англия Премер-лигасининг сўнгги турида "Кристал Пелас"га қарши кечган баҳсда ғалати воқеа юз берди. Арсенал жамоасининг икки нафар мухлиси Селхерст Парк стадионига ноқонуний киришга уринаётганда қўлга олинди. Улар ўйин якунидаги тарихий тақдирлаш маросимини ўз кўзлари билан кўриш учун стюардлар кийимини кийиб олишган. Бу ҳақда Goal.com хабар беради.
35 ва 37 ёшли ушбу шахслар махсус нур қайтарувчи нимчалардан фойдаланиб, стадион ходимлари орасига суқилиб киришга ҳаракат қилишган. Бироқ турникетлар олдида ҳақиқий стюардлар уларнинг шубҳали хатти-ҳаракатларини сезиб қолишган ва дарҳол полицияга хабар беришган. Метрополитан полицияси фирибгарликда гумон қилинган ушбу шахслар ҳибсга олинганини тасдиқлади.
Арсенал ушбу учрашувда 2:1 ҳисобида ғалаба қозониб, чемпионлик кубогини боши узра баланд кўтарди. Мухлисларнинг бундай таваккалга қўл уришига сабаб — меҳмондаги ўйин учун чипталар етишмовчилиги ва клубнинг узоқ кутилган ғалабасини бевосита майдонда нишонлаш истаги бўлган.
Шу билан бирга, Лондоннинг шимолий қисмида, яни "Эмирейтс" стадиони атрофида ҳам тартибсизликлар кузатилди. Минглаб мухлислар чемпионликни нишонлаш учун кўчаларга чиқишган. Полиция маълумотларига кўра, ҳудудда жамоат тартибини бузган, маст ҳолатда бўлган ва ходимларга қаршилик кўрсатган 17 киши ҳибсга олинган.
"Кристал Пелас" раҳбарияти ушбу ҳодисадан сўнг хавфсизлик чораларини кучайтиришини ва чипталарни ноқонуний тарқатган ёки фирибгарлик ишлатган мухлисларга нисбатан қатъий чоралар кўрилишини маълум қилди. Бундай мухлислар келгуси мавсум учун абонемент сотиб олиш ҳуқуқидан бутунлай маҳрум этилиши мумкин.
“Zamin”ни Telegram'да ўқинг!
