Барселона спорт директори Деко Камп Ноу стадионида ижара асосида тўп сураётган Маркус Рэшфорд ҳақида илиқ фикр билдирди. Англиялик ҳужумчи Манчестер Юнайтед клубидаги босимлардан узоқлашиб, Испанияда ўз ўйинини топиб олди. Деко футболчининг профессионаллиги ва жамоага қўшган ҳиссасини юқори баҳолади. Бу ҳақда Goal.com хабар беради.
Ханси Флик бошқарувидаги ҳужум чизиғида рақобат кучли бўлишига қарамай, Рэшфорд барча мусобақаларда 14 та гол уришга муваффақ бўлди. Айниқса, унинг El Clasico баҳсида Реал Мадрид дарвозасига жарима зарбасидан киритган голи мавсумнинг энг ёрқин лаҳзаларидан бирига айланди. Деко BBC Sport нашрига берган интервюсида: "Маркус бизга жуда кўп ёрдам берди. Унинг даражасидаги футболчи учун ижара асосида келиш осон эмас, лекин у Рафинья ўрнини муносиб тўлдирди", — деб таъкидлади.
Манчестер Юнайтед раҳбарияти Рэшфордни бутунлай сотиб юборишга тайёр экани ҳақида хабарлар тарқалмоқда. Эндиликда асосий эътибор Барселона клубининг 35 миллион евролик трансфер бандини фаоллаштиришига қаратилган. Ҳужумчининг ўзи ҳам самарали мавсумдан сўнг Ла Лигада қолиш истагини билдирган бўлса-да, Деко якуний келишув борасида ҳозирча аниқ тўхтамга келинмаганини айтди.
Sport директори, шунингдек, жамоанинг келажагига ҳам тўхталиб ўтди. Ламине Ямал ва Пау Кубарси каби ёш юлдузлар етишиб чиқаётган Барселона янги ғалабалар даврига қадам қўяётганига ишончи комил. Деконинг сўзларига кўра, кетма-кет икки марта чемпионликни қўлга киритганига қарамай, жамоанинг совринларга бўлган ташналиги ҳали сўнгани йўқ.
“Zamin”ни Telegram'да ўқинг!
