Арсенал бош мураббийи Микел Артета жамоаси Англия Премер-лигаси чемпионлигини қўлга киритгач, футболчилар елкасидан улкан руҳий юк тушганини маълум қилди. Испаниялик мутахассиснинг таъкидлашича, узоқ кутилган ғалаба жамоага Чемпионлар лигаси финали олдидан улкан ҳиссий қувват бағишлаган. Эндиликда "тўпчилар" Будапештда бўлиб ўтадиган ҳал қилувчи баҳсда Пари Сен-Жермен жамоасига қарши майдонга тушадилар. Бу ҳақда Goal.com хабар беради.
МАРКА нашрига берган интервюсида Артета 22 йиллик танаффусдан сўнг қўлга киритилган чемпионлик клуб менталитетини бутунлай ўзгартирганини айтди. Мураббийнинг сўзларига кўра, аввалги муваффақиятсизликлар туфайли ёпишган "омадсизлар" тамғасидан қутулиш жамоага ўзига бўлган ишончни қайтарган. "Ҳозир бизда қувонч ва енгиллик ҳисси бор. Биз бу юкни ташлаб юбордик ва энди бор эътиборимизни Чемпионлар лигасини ютишга қаратамиз", — дея қўшимча қилди у.
Артета мавсум давомидаги қийинчиликлар ва ўзига бўлган шубҳалар ҳақида ҳам тўхталиб ўтди. У баъзида жамоани бошқаришга лойиқлигига шубҳа қилганини, бироқ якунда барча тўсиқларни биргаликда енгиб ўтишганини таъкидлади. Мураббий учун энг муҳими натижага эришиш ва футболчиларда ғолиблик руҳини шакллантириш бўлган.
Сўнгги пайтларда жамоанинг ҳимоявий ўйини учун билдирилган танқидларга жавобан, Артета тактик мослашувчанлик муҳимлигини айтди. Жиддий жароҳатлар инқирози даврида у турли усулларни қўллашга мажбур бўлганини тушунтирди. "Агар жароҳатларимизни ҳисобга олиб, чемпионлик имкониятимизни ҳисоблаганда, у атиги 2 фоизни ташкил этарди. Мен эса бунга рози бўла олмасдим ва ғалаба қозонишнинг бошқа йўлларини топдим", — деди Арсенал устози.
“Zamin”ни Telegram'да ўқинг!
