Apple компанияси кутилмаганда Mac Studio компьютерлари учун тақдим этиладиган 512GB оператив хотира (RAM) вариантини сотувдан олиб ташлади. Эндиликда ушбу қурилмалар учун максимал хотира ҳажми 256GB қилиб белгиланди. Компания ушбу қарорни расман изоҳламаган бўлса-да, мутахассислар буни глобал миқёсда кузатилаётган DRAM хотира чиплари танқислиги билан боғламоқда. Бу ҳақда macrumors.com хабар беради.
Жорий ўзгаришлар нафақат хотира ҳажмини, балки нархларни ҳам қамраб олди. Хусусан, M3 Ultra чипига эга моделлар учун 256GB RAM янгиланиши нархи аввалги 1600 доллардан 2000 долларгача қимматлашди. Ҳозирги вақтда 256GB хотирали Mac Studio'ни буюртма қилган харидорлар ўз қурилмаларини олиш учун май ойигача кутишларига тўғри келади.
Таҳлилчиларнинг фикрича, Mac Studio'га бўлган талабнинг ортиши, хусусан, сунъий интеллект (AI) воситаларини маҳаллий даражада ишлатишга бўлган қизиқиш ҳам етказиб бериш муддатларининг чўзилишига сабаб бўлмоқда. Гарчи Apple бошқа компанияларга қараганда хотира таъминотини барқарор ушлаб туриш имкониятига эга бўлса-да, глобал хомашё танқислиги технология бозоридаги барча ишлаб чиқарувчиларга ўз таъсирини ўтказмоқда.
Келгуси йилларда, аниқроғи 2026-йилда Apple Mac Studio'нинг янги M5 Max ва M5 Ultra чиплари билан жиҳозланган авлодларини тақдим этиши кутилмоқда. Ҳозирча эса фойдаланувчилар мавжуд чекловлар шароитида ўз танловларини амалга оширишга мажбур бўлишади.
“Zamin”ни Telegram'да ўқинг!
