Москва транспорт департаменти матбуот хизмати хабарига кўра, виртуал «Тройка» картасидан фойдаланиш кўрсаткичи икки йил ичида 16 миллион мартадан ошди. 2024-йилнинг май ойида ишга туширилган ушбу сервис йўловчиларга шаҳар транспорти учун тўловларни бевосита смартфон ёрдамида амалга ошириш имконини бермоқда. Бу ҳақда Ixbt.com хабар беради.
Ҳозирги вақтда тўлов тизими QR-код технологияси асосида ишламоқда. Йўловчилар турникетдаги сканерга смартфон экранидаги фаол QR-кодни яқинлаштиришлари ёки валидатордаги кодни сканерлашлари кифоя. Москва мери ўринбосари Максим Ликсутовнинг таъкидлашича, виртуал карта нақд пул ва пластик карталардан воз кечиш имконини берувчи экологик тоза тўлов усулидир.
Сервис фаолияти давомида фойдаланувчилар ўз виртуал ҳисобларини 3,8 миллион мартадан ортиқ тўлдиришган. Виртуал «Тройка»нинг функционаллиги пластик картадан қолишмайди: у метро, Москва марказий ҳалқаси ва ерусти транспорти ўртасида бепул ўтиш имкониятини сақлаб қолади.
Келажакда тизимга NFC технологияси орқали тўлов қилиш функциясини жорий этиш режалаштирилган. Ҳозирда ушбу функция синовдан ўтказилмоқда ва у биринчи навбатда Android операцион тизимидаги смартфон эгалари учун тақдим этилади. NFC орқали тўлов хизмати 2026-йил якунига қадар тўлиқ ишга тушиши кутилмоқда.
“Zamin”ни Telegram'да ўқинг!
