Microsoft компаниясининг сунъий интеллект йўналиши раҳбари Мустафо Сулаймон сўнгги кунларда жуда кўп инсонлар орасида «сунъий интеллект психози» деб аталган хавфли ҳолат тобора кенгайиб бораётгани ҳақида жиддий огоҳлантириш берди. Бу ҳақда The Times нашри маълум қилди.
Сулаймоннинг таъкидлашича, сунъий интеллектга нисбатан ортиқча қизиқиш ва унга боғланиш шиддат билан ўсмоқда. Айрим шахслар СИни онгга эга мавжудот сифатида қабул қила бошлаган, ҳатто унга нисбатан гўёки романтик муносабатлар пайдо бўлганига ишонмоқда. Шунинг ортидан турли руҳий галлюцинациялар ҳам кузатилаётгани қайд этилди.
Энг хавотирлиси шундаки, бундай ҳолат фақат руҳий касалликка мойил одамларгина эмас, балки мутлақо соғлом инсонларга ҳам таъсир кўрсатиши мумкин.
— Қанчалик оғир эшитилмасин, ушбу ҳолат яқин келажакда глобал кўлам олиши эҳтимолдан холи эмас. Бунинг таъсири остига руҳий муаммоси бор одамлар ҳам, руҳияти барқарор шахслар ҳам тушиб қолиши мумкин, — дейди мутахассис.
Айни пайтда «сунъий интеллект психози» тиббий жиҳатдан ҳали расмий атама сифатида қабул қилинмаган. Бироқ у ChatGPT ёки Grok каби чат-ботлардан фойдаланувчиларнинг реал ҳаётдан узилиб қолишига сабаб бўлаётгани аллақачон кузатилмоқда.
Тиббий визуализация соҳаси эксперти Сюзан Шелмердин эса келгусида шифокорлар беморларга, худди чекиш ёки спиртли ичимликка бўлган одатлари ҳақида сўралгандек, «сунъий интеллектдан қанчалик тез-тез фойдаланасиз?» деган савол ҳам берилиши мумкинлигини таъкидлади.
Шу тариқа, сунъий интеллект технологиялари фақат имконият ва қулайликларни эмас, балки руҳий саломатликка жиддий хавф солиши мумкинлиги ҳақида ҳам ўйлаб кўриш вақти келгани кўрсатилди.
«Замин»ни Telegram’да ўқинг!
