Марокаш миллий жамоаси навбатдаги Африка миллатлар кубогида ғалаба қозониш учун энг катта имкониятга эга терма жамоа сифатида эътироф этилди. Бу ҳақда нуфузли Opta статистик портали ўз таҳлилларига таяниб хабар берди. Мутахассислар ҳисоб-китобига кўра, айнан Марокаш қитъа биринчилигида энг юқори чемпионлик эҳтимолига эга.
21 декабр куни старт оладиган Африка миллатлар кубоги Марокаш яшил майдонларида бўлиб ўтади. Турнирда жами 24 та терма жамоа иштирок этиб, қитъанинг энг кучлиси номига даъво қилади. Мезбон жамоа сифатида Марокаш нафақат уй майдони омили, балки таркиб ва форма жиҳатдан ҳам рақибларидан устун экани таъкидланмоқда.
Opta маълумотларига кўра, Марокашнинг чемпион бўлиш эҳтимоли 19,1 фоизга баҳоланган. Бу кўрсаткич турнир иштирокчилари орасида энг юқориси ҳисобланади. Иккинчи ўринда Миср терма жамоаси жой олган бўлиб, унинг ғалаба қозониш имконияти 12,4 фоиз деб баҳоланган. Кучли учликни эса 12,3 фоизлик кўрсаткич билан Сенегал якунлаб турибди.
Қайд этиш жоизки, Марокаш миллий жамоаси Африка миллатлар кубогида охирги марта 1976 йилда чемпионликни қўлга киритган. Орадан қарийб ярим аср ўтган бўлса-да, бу сафар жамоа тарихни янгилаш имкониятига жуда яқин турибди. Айни пайтда мусобақанинг амалдаги ғолиби Кот-д'Ивуар ҳисобланади ва у ҳам соврини ҳимоя қилиш ниятида.
Марокаш терма жамоасининг ҳозирги таркиби жаҳон футболида танилган юлдузларга бой. Аввалроқ Ашраф Ҳакими Африкада йилнинг энг яхши футболчиси деб топилган, Яссин Буну эса қитъанинг энг кучли дарвозабони сифатида эътироф этилган эди. Бу эса жамоанинг ҳимоя ва ҳужумда мувозанатли эканини кўрсатади.
Қисқаси, мезбон сифати, кучли таркиб ва юқори ишонч Марокашни бу йилги Африка миллатлар кубогида асосий фаворитга айлантирмоқда. Энди барчаси майдонда ҳал бўлади — мухлислар эса катта интрига ва қизиқ баҳслар арафасида.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
