Оғир вазн тоифасида IBF, WBA, WBO ва IBO камарларига эгалик қилган собиқ жаҳон чемпиони Энтони Жошуа Жейк Пол устидан қозонилган ғалабадан кейин кутилмаган тарзда очиқ танқид билан чиқди. Британиялик боксчи ўз сўзларида натижа борлигини, аммо ўзи истаган даража умуман чиқмаганини яширмади.
Жошуанинг таъкидлашича, бу жанг унга қониқиш эмас, аксинча, кўпроқ саволлар қолдирган. Унинг фикрича, олтинчи раундда нокаут билан якунланган баҳс ташқи томондан ишончли кўринган бўлиши мумкин, аммо ички ҳиссиёт бошқача.
«Мен анча яхшироқ жанг қилишим керак эди. Бу — ғалаба, лекин муваффақият эмас. Мен ҳам, мураббийим ҳам бундан кўпроғини кутгандик. Энди эса орқага қайтишнинг иложи йўқ. Вақтни ортга суриб бўлмайди. Олдинга қарашим керак», — деди Жошуа.
Унинг сўзларида яна бир муҳим жиҳат бор: Энтони бу жангни ўз фаолиятидаги навбатдаги сабоқ сифатида қабул қилмоқда. У ғалаба билан “яшаб қолиш” нияти йўқлигини очиқ айтди ва ўз устида ишлаш зарурлигини таъкидлади.
«Ўрганишим керак бўлган жуда кўп жиҳатлар бор. Шунинг учун ростини айтсам, мен ҳурсанд эмасман», — дея хулоса қилди у.
Эслатиб ўтамиз, АҚШда бўлиб ўтган бокс оқшомида Энтони Жошуа WBA рейтингида 14-ўринда турган блогер-боксчи Жейк Полни олтинчи раундда нокаутга учратган эди. Бироқ бу ғалаба тажрибали чемпион учун янги мақтанч эмас, балки янги босқич олдидан жиддий огоҳлантириш бўлиб чиқди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
