"Интер Майами" клуби эгаси Хорхе Мас жамоанинг афсонавий ҳужумчиси Лионель Месси фаолиятини якунлаганидан кейинги режалари билан ўртоқлашди. Ҳозирда аргентиналик юлдузнинг клуб билан шартномаси 2028 йилгача амал қилади, бироқ раҳбарият ҳозирданоқ келажакдаги таркибни шакллантириш устида иш бошлаган. Бу ҳақда Goal.com хабар беради.
Маснинг сўзларига кўра, клубнинг мақсади фақатгина Мессининг борлигидан фойдаланиш эмас, балки жамоада доимий ғалаба маданиятини сақлаб қолишдир. Унинг таъкидлашича, мухлислар жамоада жаҳон даражасидаги юлдузлар ва иқтидорли ёш футболчилар уйғунлигини кўришни исташмоқда. Бу орқали "Месси эффекти" клуб тарихида доимий мерос бўлиб қолиши кўзланган.
Клуб раҳбари яқинда очилган янги стадион ва кўнгилочар мажмуа АҚШ футбол бозорини ривожлантиришда муҳим қадам бўлишини айтди. Маснинг фикрича, Америка лигаси ҳали тўлиқ ўзлаштирилмаган улкан салоҳиятга эга ва "Интер Майами" бу бозорда етакчи ўринни эгаллашни мақсад қилган.
«Мен Мессидан кейинги икки йил давомида завқ олишни истайман. Мухлисларимиз эса доим кейинги юлдуз ким бўлишини сўрашади. Биз доимо юлдуз футболчиларни жалб қилишга интиламиз, лекин мухлисларимиз учун энг муҳими — курашиш ва ғалаба қозонишдир», — дея қўшимча қилди клуб эгаси.
“Zamin”ни Telegram'да ўқинг! 
