«Манчестер Юнайтед» жамоаси «Брентфорд» билан ўйинга бошқа ҳомий логотипи туширилган либосда чиқади
«Манчестер Юнайтед» жамоаси Англия Премьер лигаси доирасида «Брентфорд»га қарши бўлиб ўтадиган учрашувда ўзгача кўринишдаги либослардан фойдаланади. Клуб глобал соғлиқни сақлаш муаммоларига қарши курашиш учун маблағ йиғиш мақсадида асосий ҳомий логотипини вақтинча алмаштиришга қарор қилди. Бу ҳақда Goal.com хабар беради.
Майкл Кэррик бошчилигидаги жамоа майдонга олд қисмида «(RED)» ёзуви туширилган махсус нашрдаги футболкаларда чиқиб келади. «Манчестер Юнайтед», «MatchWornShirt» ва «(RED)» ташкилотлари ўртасидаги ҳамкорлик доирасида мухлислар ушбу ноёб либосларни сотиб олиш имкониятига эга бўладилар.
«MatchWornShirt» асосчиларидан бири Теймен Зондервейкнинг таъкидлашича, ушбу лойиҳа мухлисларнинг футболга бўлган иштиёқини дунё миқёсидаги ҳаётий муҳим дастурларни қўллаб-қувватлашга йўналтиради. Ўйинда кийилган ва футболчилар томонидан имзоланган либослар кимошди савдосига қўйилади.
«(RED)» ижрочи директори Кейт Чарлзнинг сўзларига кўра, ҳар бир футболка майдондаги воқеалар билан бирга, тиббий ёрдамга муҳтож жамоаларга кўмаклашиш тарихини ҳам ўзида мужассам этади. Хайрия акцияси 27 апрелдан 2 майга қадар давом этиши белгиланган.
“Zamin”ни Telegram'да ўқинг! 
