Арсенал ҳимоячиси Риккардо Калафиори жамоасининг Англия Премер-лигасидаги тарихий ғалабасидан сўнг кийиниш хонасида юз берган ҳаяжонли лаҳзалар ҳақида сўзлаб берди. Италиялик футболчининг тан олишича, Манчестер Сити жамоасининг Борнмутда очко йўқотиши 22 йиллик танаффусдан сўнг кутилган чемпионликни расмийлаштириб, жамоада ҳақиқий ҳиссиётлар портлашига сабаб бўлган. Бу ҳақда Goal.com хабар беради.
Мавсум давомида 26 та ўйинда майдонга тушган Риккардо Калафиори Чемпионлар лигаси финали доирасидаги Пари Сен-Жермен билан баҳс олдидан ўз хотиралари билан бўлишди. Арсенал 19-май куни расман чемпионликни қўлга киритган эди. Микел Артета шогирдлари сўнгги турда Кристал Пелас устидан 2:1 ҳисобида ғалаба қозониб, энг яқин таъқибчисидан етти очко ўзиб кетишди.
"Англия Премер-лигасида ғолиб чиқиш болаликдаги орзуларимдан бири эди. Борнмут ва Манчестер Сити ўртасидаги ўйиннинг якуний ҳуштаги янграган лаҳза энг бахтли дамимиз бўлди. Ўшанда барча — мураббийлар штаби, футболчилар бирдек қувондик. Шаҳар бўйлаб сайр қилар эканман, бу ғалаба мухлислар учун қанчалик муҳимлигини ҳис қилдим", — дейди Риккардо Калафиори.
Ҳимоячи, шунингдек, Микел Артета қўл остида мослашиш жараёни ҳақида ҳам тўхталиб ўтди. Унинг сўзларига кўра, Англия чемпионати Италия А Сериясидан иш тартиби ва ўйинлар интенсивлиги билан тубдан фарқ қилади. Арсенал клубининг мураббийга вақт бергани ва узоқ муддатли лойиҳага ишонгани якунда ўз мевасини берганини таъкидлади.
Ҳозирда Лондон клуби бор эътиборини Париж клубига қарши бўладиган Чемпионлар лигаси финалига қаратган. Риккардо Калафиори ҳафталик иш тартиби ва тикланиш жараёнлари Европада энг юқори даражада эканлигини, бу эса жисмоний ҳолатни сақлаб қолишда муҳимлигини қўшимча қилди.
“Zamin”ни Telegram'да ўқинг!
