Tesla Model Y АҚШ Миллий йўл ҳаракати хавфсизлиги бошқармаси (НҲТСА) томонидан ҳайдовчиларга ёрдам бериш тизимлари (АДАС) учун жорий этилган янги хавфсизлик талабларига жавоб берган биринчи автомобилга айланди. Янгиланган стандартлар доирасида тўртта мажбурий синов жорий этилган бўлиб, улар пиёдаларни аниқлашда автоматик тормозлаш, кўр зоналарни назорат қилиш ва автомобилни йўлакда ушлаб туриш функцияларининг самарадорлигини текширади. Бу ҳақда Ixbt.com хабар беради.
Ҳозирча Модел Й натижалари Tesla компаниясининг ўзи томонидан тақдим этилган маълумотларга асосланади, чунки 2026-йилги модел йили учун ишлаб чиқарувчиларга дастлабки маълумотларни мустақил тақдим этишга рухсат берилган. Бироқ, НҲТСА ушбу кўрсаткичларни келгусида ўзининг мустақил лабораторияларида қайта текширувдан ўтказади. Агар автомобил белгиланган талабларга жавоб бермаса, унинг мувофиқлик мақоми бекор қилинади.
Ушбу янгилик НКАП дастурининг бир қисми бўлиб, у анъанавий беш юлдузли хавфсизлик рейтингларини янада кенгайтиради. Илгари автомобил ишлаб чиқарувчилари ўзларининг ёрдамчи тизимларини маркетинг мақсадларида турли хил тақдим этишган бўлса, эндиликда НҲТСА ушбу функцияларни ягона давлат стандарти асосида баҳолашни бошлади.
2027-йилги модел йилидан бошлаб НҲТСА АДАС тизимларини тўлиқ мустақил синовлардан ўтказишга ўтишни режалаштирмоқда. Бу қадам автомобил саноатида хавфсизлик технологиялари бўйича шаффофликни оширишга ва рақобатни шунчаки функциялар эмас, балки тасдиқланган хавфсизлик даражаси асосида қуришга хизмат қилади.
“Zamin”ни Telegram'да ўқинг!
