«Комо» бош мураббийи Сеск Фабрегас А Серия пешқадами «Интер»га қарши кечган драматик баҳсдан сўнг ўз жамоасининг ўйинидан фахрланишини билдирди. «Стадио Синигаля»да ўтган учрашувда мезбонлар 4:3 ҳисобида имкониятни бой берган бўлса-да, испаниялик мутахассис натижадан кўра жамоасининг узоқ муддатли ривожланишига эътибор қаратмоқда. Бу ҳақда Goal.com хабар беради.
Учрашув давомида «Комо» Алекс Валле ва Нико Паснинг голлари эвазига икки тўпли устунликка эга бўлган эди. Бироқ «Интер» ҳужумчилари Маркус Тюрам ва Дензел Думфриснинг дубллари эвазига вазиятни ўзгартиришга муваффақ бўлди.
Бу «Комо» учун А Серия тарихида икки тўп фарқи билан олдинда бориб, мағлубиятга учраган илк ўйин сифатида қайд этилди.
Фабрегас ўйиндан сўнг берган интервьюсида турнир жадвалидаги ўринга қизиқмаслигини таъкидлади. Унинг сўзларига кўра, жамоаси чемпионат етакчисига қарши 20 та зарба йўллагани тактик ўсишдан далолат беради.
Мураббий ўз шогирдларининг жасорати ва характерини юқори баҳолаб, хатолар ёш жамоа учун табиий ҳол эканини қайд этди.
«Комо» президенти Мирван Суварсо ҳам Фабрегаснинг фаолиятига юқори баҳо бериб, келажакда у «Арсенал», «Барселона» ёки «Челси» каби гранд клубларни бошқариши мумкинлигини истисно қилмади. Ҳозирда жамоа 5-ўринда бормоқда ва олдинда уларни «Сассуоло»га қарши баҳс ҳамда Италия кубоги ярим финали доирасида «Интер» билан жавоб ўйини кутмоқда.
“Zamin”ни Telegram'да ўқинг!
