"Ман Сити" ҳимоячиси Жон Стоунз жорий мавсум якунида клубни тарк этишини расман эълон қилди. Англиялик футболчи "Этихад" стадионидаги ўн йиллик муваффақиятли фаолиятидан сўнг эркин агентга айланади. Бу ҳақда Goal.com хабар беради.
31 ёшли ҳимоячи ўз қарорини ижтимоий тармоқлар орқали ҳиссиётларга бой видео билан маълум қилди. У 2016 йилда "Эвертон"дан трансфер қилинганидан буён жамоанинг ажралмас қисмига айланиб, Пеп Гвардиола қўл остида замонавий ҳимоячи ролини янги босқичга олиб чиқди.
Стоунз ўз мурожаатида клуб унинг учун ўн йил давомида уй бўлганини ва бу ерга ёш бола бўлиб келиб, эркак киши сифатида кетаётганини таъкидлади. У Манчестерда 19 та соврин, жумладан, олтита Премьер-лига чемпионлиги ва Чемпионлар лигаси кубогини қўлга киритди.
Сўнгги икки мавсумда жароҳатлар туфайли Стоунзнинг ўйин амалиёти камайиб кетди. У октябрь ойидан бери Премьер-лигада асосий таркибда майдонга тушмади.
Шунга қарамай, ҳимоячи мавсум якунига қадар жамоага янги совринлар ютишда ёрдам беришни мақсад қилган.
“Zamin”ни Telegram'да ўқинг!
